INGOT MAMBANGUN BONA PASOGIT

INGOT MAMBANGUN BONA PASOGIT

Bona ‘pasogit’ ima tano hatubuan. Di si do pusokta di tanom jala di si do hita dipagodanggodang, bahkan sumber alam na di bona pasogit do dikelola na tuatuanta laho pasingkolahon hita. Pandohan ‘bona pasogit’ dihangkam i do tongtong asal ni natuatuanta dohot oppugng sian natuatua baoa, lapatanna, nang pe so di si hita sorang alai natuatuanta manang oppugng do di si ditubuhon, tongtong doi rajumanta songon bona pasogitta.

Nungnga tung torop hita Batak marserak sian bona pasogitta be jala torop do naung marhasil di pangarantoanna be. Jala tongtong do torop na so berhasil dope. Keberhasilan na minaksud di son ima dalam hal materi. Mauliate ma di Tuhanta ala ditumpahi do angka ngolu ni dongan na marserak sian bona pasogit.

Ketepatan hami maringanan di Porsea, Kab. Tobasa, Sumatera Utara, alai anggo bona pasogit di Hajoran do, Kec. Parmonangan, Tap-Utara, Sumatera Utara. Nungnga mandalani 4 taon hami melayani di Huria Kristen Indonesia (HKI), tongon di HKI Patane, Ressort patane Porsea. Sai pinarohahon do kepedulian ni angka dongan na di parserakan laho mambangun bona pasogitna.

Di naparpudion nungnga piga-piga halak sian angka dongan na berhasil di parserakan diabadikan goarna gabe goar ni dalan di Kab. Toba, isarana; Jln. Prof. Dr. Midian Sirait, Jln. Sabam Sirait, Jln. Dr. Ir. Bisuk Siahaan, Jln. Prof. Tarnama Sinambela, Jln. Dr. DL. Sitorus dohot angka na asing dope.

Pengabadian ni goar ni angka dongan na di ginjang i, ima na marojahan di kepeduliannasida mambangun bona pasogit, baik di pendidikan nang di angka bidang na asing. Sada paradigma na imbaru do gagasan i, ala memang sebelumna tu angka naung mate do dipatupa songon i, alai angka na ginoaran na di ginjang i mangolu dope nasida. Paradigma na imbaru i marojahan di pamingkirion; menghormati jasa-jasa nasida. Sekaligus muse mengharapkan partisipasi na lebih maksimal sian nasida uju di ngoluna laho pahehehon pembangunan di bona pasogit. Dungkon ni i muse songon sada silaturahmi tu angka pomparan nasida asa tongtong udutan ni angka pinomparna bogas ni na tuatuana laho manambornambori na pinungka ni na tuatuana laho pahehehon pembangunan di bona pasogit.

Pengabadian goar ni dalan na parpudion, ima di ari Jumat, 13 Juni 2009, ima Jln. Sabam Sirait. Dohot do hami songon parhobas sian tongatonga ni Huria dohot manghobasi ulaon i. Hami songon pribadi Pelayan mamereng sada gagasan na denggan do i sian pihak ni PEMKAB Tobasa dalan paingothon angka na di parserakan asa mangalehon perhatian mambangun bona pasogit.

Ingot mambangun bona pasogit, on ma sada sosososo sian hami pihak pelayan Gereja. Nangpe sasintongna, so pola diabadihon goarta gabe goar ni dalan alai anggo mambangun bona na ingkon do i. Molo sude do angka dongan na marserak mangalehon pehatian tu pembangunan ni bona pasogit hombar tu gogona be yakin do hita tu hatopna do bona pasogitta, khususna daerah Toba, tu majuna. “Tajomna do rantosna, rim ni tahi do gogona”, molo saroha sapingkiran angka na di parserakan mangalehon perhatian tu hamajuon ni bona pasogit, lam tu sejahterana ma masyarakat na tinggal di bona pasogit, lam tamba dalan ni pandaraman di nasida.

Pengalaman saleleng melayani di daerah Toba hami, torop do naung marhasil di parserakan, molo nungnga marujung ngoluna tongtong do tu Toba di boan bangkena. Maksud nami di si, molo tongtong do tu Toba diboan bangkenta molo nungnga marujung ngolunta sian portibion, denggan nian uju mangolu hita jala ditumpak Debata ngolunta di parserakan i, talehon rohanta mambangun bona pasogit. Rajumanta do i gabe parhitean ni pasupasu hita di si.

Masibetabetaan ma hita mambangun bona pasogitta…, Selamat membangun bona pasogit. Tu angka dongan na so berhasil dope di parserakan, di bagasan habengeton ma hita mangalugahon solu ni ngolunta. Unang pintor pesimis hita. Nasa na Porsea tu Tuhan i selalu do optimis manatap ari marsogot. Horas bona pasogit.