Jumat, 02 Mei 2014

JAMITA MINGGU, 18 MEI 2014



BAHAN JAMITA MINGGU, 18 MEI 2014
MINGGU KANTATE
Ev. Ul. Ap. 7: 54-60 (Ep.: Psalmen 31: 2-6, 16-17)
                 ========================================================

MAMELEHON DIRI NANG TONDI TU JESUS
(Menyerahkan Diri dan roh kepada Yesus)

I.      Patujolo
1.    Pangantusionku nang haporseaonku taringot tu na mamelehon dirion, ima pasahathon ngolu, manang mengabdi tu sada tujuan na tontu. Marragam do tujuan na tontu i, isarana tu ulaon ni Tuhan i, tu missi teroris, tu angka ulaon na denggan, tu angka ulaon haportibion, tu sibolis nang angka dohot na asing. Saguru tu sasahalak i ma tu dia ibana mangabdi manang pasahathon ngoluna.
2.    Molo hita angka na porsea di Jahowa Debata, naung mangain hita marhite Jesus gabe anakNa, pada prinsipna, ingkon tu Ibana do hita pasahathon ngolunta manang mengabdihon ngolunta, ala ndang hita be parnappuna di daging nang tondinta, alai Jahowa Debata do, ala naung ditobus hita. Alai jotjot do ndang sarrombang  prinsip i dohot hataridaanna. Ndang sarupa goarna dohot daina. Kristen ninna ibana, alai ndang Kristen pangalahona. Masa pe angka i, tontu marpardomuan do i tu kwalitas ni hakristenonna sandiri. Ndang Tondi ni Debata dope, songon Stefanus, anggo na manggohi ngoluna, alai tondi ni angka na di portibion dope, atik pe naung piga-piga sundut na saompu i naung Kristen. Hadirion sisongon i do na dapot di halak Kristen na manjalo surat Heber: “Ai tumimbangkon lelengna i, nungnga patut guru hamu nian, hape angka sisiasia ni hata ni Debata dipe siajarhononhon tu hamu; gabe susu nama ringkot di hamu, ndada sipanganon hian”, (5:12).
3.    Turpuk jamitantaon menerawang hadirionta saluhutna, baik ruas nang angka parhalado taringot tu pamelehonon diri nang tondi tu Jesus. Di hadirion ni Stepanus torang tabereng militansi na marKristus i, atikpe hosa gararna. Panindangionna i sandiri pataruhon ibana tu na mate martir (mate ala manghajongjongkon haporseaonna di Kristus i). Adong do ra nang sian tonga ni hita halak Kristen na mandok, anggo cerita alkitab antong ingkon songon i do, alai boha bahenon mangihuthon i, di portibion dope iba; hape Stepanus na di turpuktaon pe tong do di portibion masa i. Molo so i didok, tarmasuk na nekat do Stepanus i, ndang bijak, nga diboto rapot godang ni halak Jahudi i boi mandabu uhum marutang hosa, jala nga dipatindang sitindangi gapgap (6:13) maradophon ibana, ndang distel jamitana i asa unang jut rohani angka peserta rapot godang i (7:52-54) gabe mambahen mate martir ibana. Molo tung pe adong na marpandapot na songon i, angka na marguru tu daging do pandapot i, ndada marguru tu Tondi manang ngolu na mian di bagasan Kristus.

II.    Usul Angka Sipahebhebaon di Naparade Jamita       
1.    Hita naung manghatindangkon, halak Kristen, siihuthon Jesus, ingkon rade jala marguru tu Tondi ni Debata, hadirion sisongon i do mambahen ndang surut mamelehon diri nang tondinta tu Jesus. Tapamanat ma jo Stepanus, ia ibana ima sahalak sian pigapiga halak na pinillit ni huria i, na gok haporseaon dohot Tondi Parbadia (6:5). Tondi i do na mangula dibagasan ibana umbahen tarpatupasa angka halongangangan dohot tanda angka na balga di jolo ni na torop i (6:8). Diulaon panghobasionna Tondi i do na mangajari ibana mangalehon alus asa ndang adong na boi mangalo ibana marsual (6:9-10). Tung Tondi i do na mangula di bagasan ibana, ndada pingkiran manang malomalo ni ibana sandiri.
Sasintongna pamelehon diri dohot tondi na, ndada holan di ujung ni ngoluna i di tingki pasahathon hosan tu Debata, alai mamungka porsea ibana tu Jesus Kristus jala diigani Tondi i. Dipelehon ibana do diri dohot tondina laho pararathon hasintongan ni Debata di bagasan Jesus Kristus, asa lam ganda bilangan ni angka na porsea. Dung di ujung ni ngoluna lam nalnal ma pamelehononna marhite na pinasahatna tondi tu Debata. Sahat tu titik darah penghabisan ndang munggil pamelehononna di diri dohot tondina tu Debata.
Sahat tu sadarion, tahaporseai do, sahat tu na ro Kristus paduahalihon, tongtong do mangula Tondi ni Debata di portibion, holanon ise do na rade jala olo marguru dohot dirajai Tondi i? Piga do ruas ni huria dohot parhaladoNa na olo mangalehon ngoluna diingani jala diajari Tondi i? Molo angka na di portibion do taanahon di ngolunta, tagamon ma hona hungkupan barita hasintongan na sian Tuhan i na tuk paluahon tondina sian hamagoan; marjea ma hita, ala so parhalado haposan hita di jolo ni Tuhan i. Mamelehon diri nang tondinta pe hita tu Jesus, ndang polin be di tonga-tonga ni huria i. Tung tungil situtu ma partondion ni hakristenonta i, jala lobi tungil situtu ma nang hakristenon ni ruas ni huria i.
Dung i molo so Tondi ni Debata do na mian di bagasan hita jala taparguru, haoloon na marsiala ma haoloonta jala mura-mura marondingonding di balik ni angka alasan, atikpe momo jala neang siulaon i.
Asa tulus jala bulus hita mamelehon diri nang tondinta tu Jesus i, manongtong ma hita mampanotnoti silang ni Tuhan i, dohot manghaporseai mudarna na arga i naung paluahon daging nang tondinta sian dosa dohot hamatean. Tung so hagarar hita do utangta tu Jesus i, alai atik pe so hagarar hita ta angsur ma saleleng mangolu (unang gabe parutang busuk tu Tuhan i), marhite na rade jala unduk mangungkap ngolunta diingani jala diajari Tuhan i. Ido mampargogoihon dohot paposhon rohanta mamelehon diri nang tondinta di adopanNa.
2.    Manongtong do marsihohot manghajongjongkon hasintongan ni Debata angka na mamelehon diri dohot tondi tu Jesus Kristus. Ndang sumurut dirina sian hasintongan ni Debata, atik pe patungosngoshon, dohot magasup angka na so olo manjangkon hasintongan i. Tung so munggil do nanggo saotik hadirionna. Hatoguon i ala Tondi ni Debata do na pahothon. Ndang olo Stepanus mangkompromihon hasintongan ni na hinatindangkonna demi haluoan pardagingon na sementara; dohot hata na asing, selamat di pardagingon haportibion alai luangan di haluaoan na manongtong i.
Sian na so tasadari, olo do hita holan mamingkirhon selamat sebatas di portibion gabe maret hadirionta sian hasintongan ni Debata, atikpe ndang pola nyawa dope taruhanna. Gabe tadok, ala di portibion dope hita, manang marpanganju do Tuhan i di si.
Molo tabandingkon do lapangan bersaksi ni Stepanus dohot hita di tingki sonarion, ndang dihadihana dope martimbangkon songit ni lapangan bersaksi ni Stepanus, on do ra mabahen lengah angka na porsea i. Alai taingot ma holan kulit luarna do aman alai anggo isina nungnga torop angka naung mate partondionna, sega karakterna dohot moralna nang sian tongatonga ni halak Kristen i sandiri. Nungnga tabereng sandiri di pileg na tanggal 9 April na lewat i, atikpe naung tasoarahon; “unang olo hita dituhor”, alai kenyataanna boi bilangan jari-jari na olo manangihon i, baliksa tahe sian tongatonga ni parhalado i adong hadirionna dituhor ummarga sian sapasang sipatu. Nungnga sega moral dohot karakter ni jolma i, on ma nuaeng lapangan bersaksitta. Unang olo hita sumurut manghatahon na sintong, baik marhitehite di tingki manghatahatai dohot angka ruas nang masyarakat, nang marhite jamita pe. Ditangihon manang ndang nasida ma na manontuhon haputusanna.
3.    Dihatindangkon Stepanus do na ni ida ni mata ni haporseaonna; diida hasangapon ni Debata dohot  Jesus jongjong di siamunNa. Tondi ni Debata do mambahen mata ni haporseaonna marnida i. Pamerengan ni mata ni haporseaon ni angka na porsea i mangalompoi batas-batas ni portibion. Ati pe songon dia timbo ni portibion tu habangsa ni Debata dohot Kristus i alai boi mata ni haporseaon manatapi.  Molo di bibelta i, dung ro pe Kristus paduahalihon asa patar hasangapon i, dohot hasangapon ni na porsea i songon anak ni Debata.
Angka na porsea na mamelehon diri dohot tondina tu Jesus do na boi mamereng hasangapon ni  Jesus marhite mata ni haporseaonna, atikpe so dipapatar Jesus dope hasisingkopna tu portibion, i do na tau mambahen marsangap Jesus i di na hinobasanna, atikpe ndang olo manjangkon na mambege panidangion i. Manontuhon situtu do pamerengan i mambahen marsangap Jesus. Jadi molo sai mangalap sangap, manang gulut di sangap dope angka na porsea i tu dirina sandiri, na holan sabatas di portibion dope panatapanna. Alana sai adong dope nang sian tonga-tonga ni angka hita parhalado di huria i na olo gabe mandele mangula ala ndang dipapujipuji dirina diulaonna.
Taingot ma kesaksian ni si Johannes: “Ia (Yesus) harus makin besar, tetapi aku harus makin kecil”, (Joh 3:30). On do prinsip hidup ni angka na mamelehon diri dohot tondina tu Jesus. Jesus Kristus i ma na marsangap, na lam ganda marhite angka na tahobasi di lapangan bersaksitta, ala naung dibereng mata ni haporseaonta di ngolu sonari hasangapon sipapataronNa marsogot.
4.    Namamelehon diri nang tondina tu Jesus, ido na tuk jala margogo mangondihon angka na manganaana. “Ale Tuhan, unang jujur dosanasida i”, ninna Stepanus. Dihangoluhon Stepanus do tiruan pinapatar ni Jesus di tingki na tarsilang i Ibana, dipandokNa: “Ale Amang marpamuati ma roham, ai so diboto nasida na niulanasida i”.
Ndang adong rugina angka na porsea i molo diondihon ditangiangna angka na manahi hamagoan ni hosana, holan na so margogo do partondionna mangulahon sisongon i. Jati diri ni angka na porsea i, ndada mamaloshon hajahaton balos ni hajahaton, panggosagosaon balos ni panggosagosaon, alai ingkon mamasumasu do, ai naeng teononna do harajaon banua ginjang i.
Jotjot hita ndang margogo mangulahon i ala marguru tu daging hita marparange. Ingkon sai marjuang do hita manaluhon pardagingonta sandiri di ganup tingki dohot ombas marhite gogo dohot huaso ni Tondi ni Debata asa marhamonangan hita. Godang do nuaengon so marnamintop angka sogo ni roha dohot dendam na sai mangonggop hasalaan ni donganna atikpe naung mardalan angka partingkian. Tung mansai dangol situtu do angka parsaoran si songon i. Mian di bagasan Jesus ma ngolunta asa marhaimbaruon ngolunta di panatapan tu dongan di ngolu siganup ari.

III.  Panutup
Jesus Kristus do nampuna ngolunta ala ni panobusonNa marhite hamamateNa. Tapelehon ma diri nang tondinta tu Ibana marhite manghatindangkon Ibana dohot ulaonNa, atikpe dihasogohon portibion hasintongan na pinaojakNa i. Taparade ma Tondi ni Debata mangingani dohot mangajari hita di ngolunta asa marsangap Debata marhite ulaonta di ganup panghobasionta. Amen
Pdt. D. Pasaribu, S.Th
HKI Res. Hinalang Silalahi Balige

Tidak ada komentar:

Posting Komentar